ተፈናቃይ በመምሰል እርዳታ ሲያሰባስቡ የተያዙ ግለሰቦች

ተፈናቃይ በመምሰል እርዳታ ሲያሰባስቡ የተያዙ ግለሰቦች በእስራትና በገንዘብ ተቀጡ

አዲስ አበባ ፣ መጋቢት 22 ፣ 2011 (ኤፍ ቢ ሲ) ከወለጋ እንደተፈናቀሉ በማስመሰል በጅማ ከተማ ህብረተሰቡን በማጭበርበር እርዳታ ሲያሰባስቡ እጅ ከፍንጅ የተያዙ ሁለት ግለሰቦች በእስራትና በገንዘብ መቀጣታቸውን ፖሊስ አስታወቀ።

የጅማ ከተማ ፖሊስ መምሪያ እንደገለጸው ግለሰቦቹ ከወለጋ እንደተፈናቀሉና ቤት ንብረታቸው እንደተወሰደ በመናገር በሀሰት ከህብረተሰቡ ለአምስት ቀን እርዳታ ሲያሰባስቡ ቆይተዋል።

ፖሊስ ከህብረተሰቡ በደረሰው ጥቆማ መሰረትም ግለሰቦቹ ላይ ባደረገው ክትትል የካቲት 22 ቀን 2011 ዓ.ም.፥ በጅማ ቢሺሼ የገበያ ማዕከል መያዛቸውን የመምሪያው የኮሙዩኒኬሽን ኃላፊ ኢንስፔክተር ገዛኸኝ አውጋቸው ለኢዜአ ተናግረዋል።

በሃሰት ካሰባሰቡት ገንዘብ ውስጥ አንደኛው መኪናውን እንድታሰራለት 5 ሺህ 300 ብር ለባለቤቱ መላኩንና፥ ሌላኛው ደግሞ 3 ሺህ 23 ብር ለዘመዶቹ መላኩን በሰጡት የእምነት ክህደት ቃል አረጋግጠዋል።

የጅማ ዞን ከፍተኛ ፍርድ ቤትም ሰሞኑን በዋለው ችሎች እያንዳንዳቸው በአንድ ዓመት ከስምንት ወራት ጽኑ እስራትና በ500 ብር እንዲቀጡ ወስኖባቸዋል።